أنا و 30 مليون نسمة
من نهار عقلت على راسي وانا كنسمع 30 مليون مغربي
النهار الاول فالتحضيري فرع لينا الاستاد ريوسنا بيها
يقطن بالمغرب 30 مليون نسمة وهو مزيج من ...... زيت العود وأملو
طلعت للثالث خديت عليها شبعة ديال العصا نهار سولتني استادة شحال عدد سكان المغرب
و قلت ليها 35 مليون نسمة
- عملت عملية حسابية منطقية وماسلكتنيش-
بسبابها ضوبلت فالموحد ديال السادس ملي حطيت ليهم 30 مليون نسمة
فالوقت اللي قال ليك المغرب فيه 28 مليون نسمة وديك 30 الاولى لا اساس لها من الصحة
الناس المكلفين بالاحصاء غلطو
طلعت للتاسعة دار لينا استاد الجغرافيا فرض على غفلة وطرح لينا فيه نفس السؤال التقليدي
كم عدد سكان المغرب؟ ، بطبيعة الحال كتبت ليهم النتيجة المصححة ديال آخر احصاء اي 28 مليون نسمة ، الاستاد حسب الجواب خطأ واتهمني بالمس بكرامة المواطن المغربي باتهامه الضمني بالعgر ، اااو علاه المغاربة مابقاوش كيولدو ا بلعنكير....
نقص لي 4 نقاط من المعدل العام ودار بي تقرير وقال لي العدد الحقيقي 36 مليون نسمة قراها وكحل بيها عينيك ا بوراس
ف 2004 فالباكالوريا تتكرر المأساة مجددا ونفس سؤال الويل
شحال من منطيح ساكن فالمغرب؟
كتبتها ديك الساعة وراسي مهزوز وكنت واثق من راسي
30 مليون نسمة وايلا كدبتوني سيرو قولوها للاداعات والجورنالات اللي قالت بالحرف الواحد
الزاكي قدر يدير اللي ماداروهش الساسة والشلاهبية الكبار بالبلاد وخرج 30 مليون مواطن مغربي للشارع
عرفتي زمطت الاستاد مالقى مايدير كيحط لي فالنقطة والتنخصيصة شاداه
واخا من وراها بعام لقيت راسي فالشارع بعدما الشارفة اللي كنت كاري عندها تشفرات ليها 30 مليون كانت مخبياها تحت الناموسية وسباتها فيا
خوكم صكع والزهر اللي ماعندوش واخا الزهر راه مستوني فليفربول
وبسبابها قررت نحرg ونغيرها لعل وعسى نتهنى من موّال 30 مليون نسمة ديال كنور
مشيت للمرسى قالو لي واحد الباطو غادي ديريكت للطاليان والحرgة فيه مضمونة
اول ما دخلت للمرسى بان لي كونطونير فيه شي حروف ماقدرت نفرزهم مع خوكم عينيه شوية مراجلات ، المهم بان لي حروف : الطاء والنون والياء والشي لاخر مابانش لي
قلت صافي هادي هي طاليانيا : يعني الطاليان بالطليانية الفصحى
زعمت وتخشيت فالكونطونير ودازت الرحلة طوييييلة جاب الله واحد الميكة ديال الحمص وواحد البوديزة ديال سيدي ولماس صوفيت بيها راسي
كي وصلت حليت عيني وقلبي كيضرب وشلة تبوريشة شداني
كي حليت عيني بان لي مكتوب بالخط العريض
welcome to tanzania
اناري ميمتي واش هاد المكتاب
مي الحمد لله على كل حال
وبالاحضان ياطنزانيا ووداعا يا مغربي الحبيب
على الاقل هنا فطنزانيا سمعنا العام اللي فات بلي البلاد فيها 5 مليون
وهاد العام قال ليك 5 766 5.66
المهم كاينة مصداقية واللي كاين كيقولوه
وماغنوصلو ل30 مليون طناز من هنا تال شي 50 ولا 60 عام
خوكم دك الوتاد و دار جنسية طنزانية وتزوج بواحد الطنزانية بوكوصة
وجابت لي شي طنينزات صغار الله يحجبهم
وعشنا فتبات ونبات وخلفنا طنينزين وطنينزات
- القصة خيالية هزلية بطبيعة الحال مي الغرض منها نفض الغبار على الواقع المتجلي فالتعتيم الاعلامي الممنهج من لدن الدولة ووسائل الاعلام التابعة ليها-
ليست هناك تعليقات:
إرسال تعليق